Sie sind hier

Day five and six

Bild des Benutzers Drina
Gespeichert von Drina am Donnerstag, 20. Oktober 2016 — 09:46

Gest Morge het s Programm nochem Zmorge für üs so agfange, dass mir wieder en Gottesdienst gha hend. Wie die letzte mol au, isch er sehr besinnlich gsi und het üs en guete Start in Tag brocht.

Nochedher hend mir de ganz Morge lang üses Jungschiprogramm für hüt Nommi plane. Da isch jo so zsege s Ziel vo üsem Lager. Dass mir allei es cools Programm ufd Bei stellle chönd und dass d Chind dra freud chönd ha. Und demit mir au eimol sones Programm würklich bis is letzte Detail planet hend, sind mir idem Kurs.

Nocheme feine Zmittag hets no en churze Block über Rollespiel geh, i dem mir ahand vo Rollespielbiispiel Alltagssituatione us de Jungschi vomene andere Blickwinkel us hend chönne betrachte. Im Rollo het immer öpperd en Leiter gspielt, wo voll überforderet isch. Denn hend mir im Plenum besproche, wie mo richtig reagiere sött.

Noch dem Theorieblock hend mir de ganz Nommitag lang en OL gmacht. Obwohls astrengend gsi isch, hets doch au no Spass gmacht.

Zum Znacht het üs d Chuchi mit Fotzelschnittene und Chai Latte überrascht. Alli hend sich mega drüber gfreut.

S Obigprogramm isch mega spannend gsi. Mir hend en Block über Suchtmittel gha. wo üs en Ma vorbereitet het. Er het Ennio gheisse und schaffet bi Best Hope. Da isch eh Klinik in Herisau für Süchtigi wo Bereit sind in Entzug z goh. Bi Best Hope schaffet si uf christlicher Basis, aber sie sind au offe für alles andere.

De Ennio het üs vo sim Lebe verzellt, wo er Drogesüchtig gsi sich, und wie er noch 12 Johre Droge devo weg cho isch. Bi ihm debi het er no de Daniel gha. De Daniel isch in Therapie vo Best Hope und isch sit fast 8 Mönet clean.

Es isch mega nett vo dene zwei gsi, dass sie extra zu üs use gfahre sind, um üs vo ihne z verzelle und au üsi Froge z beantworte. Es riisigs Dankeschön a die zwei. Es isch en unvergessliche Obig gsi.

Mir hend de ganz Obig lang no mit andere Teilnehmer oder mit de Leiter über so Themene diskutiert.

Tag 6

Hüt nommitag isch üsen grosse Test. Deswege schrieb i au nöd viel drüber und verabschiede mi au scho wieder.

En schöne Tag no

- Drina

Kommentare

Bild des Benutzers Adler

Vorgester hend mir au en coole und astrengende OL gha. Am 2. Obig hett üs eine vo sim Lebe verzellt, wo er au Droge abhängig gsi isch und denn durch Best Hope Clean worde isch. Da hani sehr iidrücklich gfunde. I wünsch eu no vill Spass im Leitertraining.

Mit villne Grüess usem Leitertraining

Adler